Тавантолгойн ордыг ашиглах Хөрөнгө оруулалтын болон дагалдах…
бусад гэрээг байгуулах асуудлаар дүгнэлт гаргаж, шийдвэрийн төсөл боловсруулах Улсын Их Хурлын ажлын хэсэг хуралдаж, дэд ажлын хэсгийн ажлын явцыг сонслоо. Тавантолгойн ордыг ашиглах Хөрөнгө оруулалтын болон бусад дагалдах гэрээний англи хэл дээрх төслийг Засгийн газраас Ажлын хэсэгт өнгөрсөн 5-ны өдөр хүргүүлсэн байна. Ажлын хэсэгт ажилллаж байгаа хуульчид гэрээний англи болон монгол хэл дээрх төслийг харьцуулан шалгаж байгаа юм байна. Англи болон монгол хэл дээрх төсөлд маш их зөрүү гарч байгаа учир гадаад хэргийн яам уруу шилжүүлж албан ёсны орчуулга хийлгэх нь зүйтэй гэж ажлын хэсгийн гишүүд үзэж байгаа юм.
Мөн Засгийн газраас Энержи Ресурс ХХК болон Чайна Шенхуа Энержи компанийн хооронд байгуулах “Хамтарсан компани байгуулах гэрээ”, Энержи Ресурс болон Эрдэнэс Тавантолгой ХК-ийн хооронд байгуулах “Эрх үүрэг шилжүүлэх гэрээ”-ний төслүүдийг Ажлын хэсэгт хүргүүлээгүй, хүлээгдэж байгааг гэж мэдэгдсэн байна. Ажлын хэсгийнхэн Засгийн газар болон хөрөнгө оруулагчаас шаардлагатай мэдээллээ хүлээн авбал гурав хоногийн дотор ажлын хэсэг дүгнэлтээ гаргахад бэлэн гэдгийг Тавантолгойн гэрээг шалгах, дүгнэлт өгөх ажлын хэсгийн ахлагч Л.Эрдэнэчимэг хэлсэн.